سياسة الخصوصية
آخر تحديث:
فصل منصة دروس أونلاين بتربط المدرسين بطلابهم. الصفحة دي بتشرح البيانات اللي بنجمعها، وليه، ومين يقدر يشوفها، وإزاي بنحميها.
البيانات اللي بنجمعها
- حساب المدرّس أو الطالب: الاسم، والبريد الإلكتروني، وكلمة المرور (متخزنة مشفّرة ومحدش يقدر يقراها، ولا حتى إحنا).
- الطالب من غير حساب: الاسم اللي بيكتبه، ورقم التليفون لو اختار يكتبه.
- الحضور: وقت الدخول والخروج من كل حصة.
- محتوى الحصة: رسايل الشات، والملفات المرفوعة، وإجابات الامتحانات السريعة، والسبورة، والواجبات وتسليماتها ودرجاتها.
- التسجيلات: لو المدرّس سجّل الحصة، بيتسجل اللي ظاهر فيها (السبورة أو الشاشة أو الكاميرات) والصوت.
الصوت والصورة
الصوت والصورة بيعدّوا مشفّرين على سيرفرات المنصة بس، ومش بنحفظهم إلا لو المدرّس شغّل التسجيل، وساعتها بتظهر علامة "جاري التسجيل" لكل اللي في الحصة. الخلفية الافتراضية بتتعمل على جهازك، والصورة الأصلية ما بتتبعتش.
مين يقدر يشوف البيانات
- المدرّس: بيشوف حضور طلابه وأرقام تليفوناتهم (لو اتكتبت) وإجاباتهم وتسليماتهم في حصصه هو بس.
- الطالب: بيشوف حصصه، ودرجاته، والتسجيلات اللي المدرّس شاركها مع الطلاب المشتركين.
- إدارة المنصة: بتشوف بيانات الحسابات وإحصائيات الاستخدام لتشغيل المنصة ومنع إساءة الاستخدام.
مش بنبيع بياناتك ومش بنشاركها مع معلنين. ممكن نكشف بيانات لو القانون طلب ده من جهة مختصة.
بنستخدم البيانات في إيه
تشغيل الحصص، وكشوف الحضور والتقارير للمدرّس، وتذكير الطلاب بمواعيد حصصهم، واسترجاع كلمة المرور، وحماية المنصة من الدخول غير المسموح.
إحصائيات الزيارات
عشان نعرف المنصة مستخدمة إزاي، بنعدّ مرات فتح الصفحة الرئيسية وروابط الحصص بنفسنا من غير أي خدمة خارجية. مش بنحفظ عنوان الـ IP؛ بنحفظ بدله رمز مجهول بيتغيّر كل يوم، فمحدش يقدر يتتبع زائر من يوم لليوم اللي بعده، ونوع الجهاز (موبايل أو كمبيوتر). التفاصيل دي بتتمسح بعد 90 يوم، ويفضل منها أرقام إجمالية بس.
الكوكيز
بنستخدم كوكي واحدة ضرورية عشان تفضل مسجّل دخول، وبنحفظ على جهازك اختياراتك (زي الوضع الفاتح أو الداكن واسمك في صفحة الدخول). مفيش كوكيز إعلانات أو تتبع.
مدة الاحتفاظ
بنحتفظ ببيانات الحساب طول ما هو موجود. المدرّس يقدر يمسح حصصه وتسجيلاته في أي وقت، ولما بيمسح حصة بيتمسح معاها الحضور والشات والواجبات بتاعتها. تسجيلات الحصص بتنزل على جهاز المدرّس أول ما التسجيل يخلص، وبنحتفظ بنسخة احتياطية منها على السيرفر 24 ساعة بس وبعدين بتتمسح.
حقوقك
تقدر تغيّر اسمك وكلمة المرور، أو تمسح حسابك بنفسك في أي وقت من زرار "الحساب" فوق في صفحتك. لما المدرّس يمسح حسابه بتتمسح معاه كل حصصه وتسجيلاتها والحضور والواجبات والملفات بتاعتها.
ومن حقك كمان تطلب نسخة من بياناتك أو تصحيحها أو مسح حسابك، وده متماشي مع قانون حماية البيانات الشخصية المصري رقم 151 لسنة 2020. ولو الطالب أقل من 18 سنة، ولي الأمر يقدر يطلب ده بالنيابة عنه.